កម្សាន្ត៖ ត្រឹមតែរយៈពេល ២៤ម៉ោងប៉ុណ្ណោះ បន្ទាប់ពីការរក្សាសិទ្ធិរបស់ Disney លើតួអង្គ Micky Mouse ត្រូវបានផុតកំណត់ ខ្សែភាពយន្តបែបភ័យរន្ធត់ចំនួនពីរ ដែលទាក់ទងនឹងតួអង្គកណ្ដុរដ៍គួរឱ្យស្រលាញ់នេះត្រូវបានប្រកាសផលិត។ Steamboat Willie ដែលជាភាពយន្ត Disney ដំបូងបង្អស់ដែលបង្ហាញអំពីកណ្ដុរ Mickey ត្រូវបានអនុម័តដោយច្បាប់របស់សហរដ្ឋអាមេរិកនៅថ្ងៃចន្ទនេះ ពោលគឺគិតមកដល់ពេលនេះមានរយៈពេល ៩៥ឆ្នាំមកហើយក្រោយការចេញផ្សាយដំបូងនៃតួអង្គនេះ។ 

ការចេញផ្សាយនូវគម្រោងភាពយន្តខាងលើនេះមានន័យថា នៅពេលនេះគ្រប់ផលិតករ និងផលិតកម្មទាំងអស់អាចធ្វើការចម្លង ប្រើប្រាស់ដោយសេរីនូវតួអង្គក្នុងខ្សែភាពយន្ត Mickey Mouse ជំនាន់ដើម។ បើទោះបីជាមានការព្រមានពី Disney ថាខ្លួននឹងស្វែងរកការការពារតួឯក Mickey Mouse ដ៏សំខាន់បំផុតរបស់ខ្លួនក៏ដោយ ផលិតករភាពយន្តបែបឱកាសនិយមត្រូវបានគេរំពឹងថានឹងប្រកាសយ៉ាងឆាប់រហ័សនូវការថតឡើងវិញ និងចេញផ្សាយនូវស្នាដៃភាពយន្តនានាដែលទាក់ទងនឹងតួអង្គដ៏មានប្រជាប្រិយភាពនេះ។ 

ជាក់ស្តែង ខ្សែភាពយន្តមួយដែលមានចំណងជើងថា "Mickey's Mouse Trap"នឹងមានឈុតឃាតករពាក់របាំងមុខ ដែលស្លៀកពាក់ជា Mickey ដើរតាមប្រមាញ់សម្លាប់ក្រុមយុវវ័យនៅទីតាំងសួនកម្សាន្ត ខណៈមានភាពយន្តមួយទៀតបែបកំប្លែង និងរន្ធត់ដែលពុំទាន់ប្រកាសពីចំណងជើង និយាយអំពីតួអង្គ Mickey ធ្វើទារុណកម្មលើអ្នកដំណើរលើកាណូតទេសចរណ៍មួយ គ្រោងនឹងចេញផ្សាយជាសាធារណៈនាខែមីនា ខាងមុខ​នេះ។

ក្រុមអ្នកវិភាគនិយាយថា Disney នឹងតាមដានយ៉ាងដិតដល់ ហើយទំនងជានឹងអនុញ្ញាតឱ្យមេធាវីចាត់វិធានការតាមច្បាប់ ប្រសិនបើមានផលិតករណាដែលហ៊ានហួសព្រំដែន ខណៈអ្នកជំនាញខាងការពារម៉ាកសញ្ញាពាណិជ្ជបញ្ជាក់ថា ខ្សែភាពយន្ត ឬផលិតផលណាមួយដែលអាចបំភាន់អ្នកប្រើប្រាស់ឱ្យគិតថាវាត្រូវបានផលិតដោយ Disney អាចនឹងត្រូវទទួលខុសត្រូវផ្លូវច្បាប់ជាមួយក្រុមហ៊ុនយក្សមួយនេះ៕